CEBU CITY-Dako ang pagtuo ni METROPOLITAN Cebu Water District (MCWD) chairman Jose Daluz III nga ang rekomendasyon sa Cebu City Legal Office (CLO) nga tangtangon siya ug ubang mga sakop sa board of directors (BOD) sa MCWD posibleng usa ka pagsulay sa pagduso sa “privatization” sa water utility.
Kini ang pamahayag ni Daluz, human nga si City Legal Officer Jerone Castillo niingon sa iyang imbestigasyon ug report sa rekomendasyon nga dili paigo ang Joint Reply ni Daluz ug sa BOD aron matubag ang mga pasangil sa kanhi mga opisyal sa MCWD Employees Union (MEU).
Una niini, nga ang kanhing mga opisyal nihangyo sa City Government nga tangtangon ang kasamtangang BOD tungod sa daghang rason lakip na ang nagkagrabe nga corporate health sa kompanya, kapakyas pagtubag sa panginahanglan sa tubig sa ilang service area, ang 70 porsiyento nga pagsaka sa presyo sa tubig sugod karong 2023, ug ang “irregular” joint venture agreements alang sa mga proyekto sa Cordova, Marigondon ug Canjulao.
Girekomenda ni Castillo ang pagpatangtang nila ni Daluz, Miguelito Pato ug Jodelyn May Seno sa BOD, nga pulos gitudlo niadtong 2019 sa kanhi mayor, Edgardo Labella.
Apan, si Daluz nagdumili sa pag-ila sa maong rekomendasyon ug niingon nga hangtod nga dili pa siya makadawat og notice gikan sa Local Water Utilities Administration (LWUA), mopadayon lang siya sa pagtrabaho sanglit ang board chairman ug management maoy nagpaluyo niini nga sitwasyon.
