CEBU – Dili na makakuha pa og tubig ang mga local government units ug uban pang entidad gikan sa mga fire hydrant gawas lang kung adunay sunog.
Niluwat ang Metropolitan Cebu Water District (MCWD) Board of Directors og resolusyon nga nagmando kang acting general manager Stephen Yee nga tugotan lang ang Bureau of Fire Protection sa pagkuha og tubig gikan sa mga fire hydrant o bisan unsang pasilidad sa MCWD.
Matod pa nga tuyo niini mao ang hugot nga pag-monitor ug pagrepaso sa sistema ug mga pamaagi, ug pagpatuman sa nagkalain-laing mga programa nga gitumong sa pagpakunhod sa non-revenue water (NRW) sa water district.
Ang NRW mao ang tubig nga ginaprodyus apan dili makaabot sa mga konsumidor ug dili mahubad ngadto sa mga kita.
Lakip sa mga hinungdan nga motaas ang NRW mao ang mga leaks, pilferage, tubig nga gigamit sa pagpatay sa sunog ug wala pa masingil nga pagkuha sa tubig.
Giingong makadaot sa financial viability sa water district ang taas nga lebel sa NRW.
Nirekomendar usab ang Commission on Audit, sa ilang 2021 report, ngadto sa MCWD nga kinahanglang ipatuman dayon ang preventive measures aron makunhuran ang NRW rate.
