CEBU – Nipahigayun og ceremonial opening ang Metropolitan Cebu Water District (MCWD) sa Lusaran Bulk Water Supply project karong adlawa Domingo, Septiyembre 18, 2022.
Ang Lusaran water project mosuplay og 15,000 cubic meters nga tubig matag adlaw sa MCWD, Naggikan kini sa tubig sa Lusaran River.
Kung diin ang pagpalit sa suplay sa tubig gihimo pinaagi sa usa ka competitive bidding ubos sa Republic Act 9184, o ang Government Procurement Reform Act.
Gisusi sa chairman sa MCWD Board of Directors nga si Jose Daluz III ug mga opisyal sa MCWD ang Lusaran Bulk Water Project aron masuta kon anaa ba kini sa tip-top nga porma alang sa pagbukas sa karung adlawa.
Uban ni Daluz sila si Engr. Joffrey Hapitan, chief executive officer sa JE Hydro and Bio-Energy Corp., ang kompanya nga nagpahigayon sa proyekto, ug MCWD assistant general manager for finance Edgar Donoso.
Nitambong usab ang mga representante sa M.E. Sicat Construction Inc., ang kontraktor sa duha ka modular tank nga adunay kapasidad nga 3,000 cubic meters matag usa, ug sa JFAP Construction, nga nagpahigayon sa pagbutang og transmission lines gikan sa mga reservoir paingon sa Barangay Busay, Lahug, Apas ug uban pa.
