CEBU – Nihangyo sa kapulisan ang Metropolitan Cebu Water District (MCWD) ug sa publiko nga tabangan sila sa pag-ila ug pagtaho sa mga kawatan ug mga namalit og water meters o metro sa tubig human kini nakatala og dakong pagsaka sa mga gikawat nga water meters sa unang bahin sa 2022.
Sa usa ka pamahayag, nagkanayon ang MCWD nga moabot sa 488 ka metro sa tubig ang gikawat gikan niadtong Enero 1 hangtod Mayo 20 ning tuiga.
Base sa ilang talaan, niabot na ang ihap sa 222 porsyento sa kinatibuk-ang ihap sa mga kinawat nga metro sa tibuok tuig 2021 nga anaa lamang sa 219 metros.
Sa 488 ka kaso, 253 ang nahitabo sa Cebu City; 80 sa Lapu-Lapu City; 67 sa Talisay City; 55 sa Mandaue City; 22 sa Compostela; 7 sa Liloan, 3 sa Cordova ug 1 sa Consolacion.
Nimando ang MCWD Board of Directors sa ilang legal department sa pagdesinyo og action plan ug pakig-alayon sa kapulisan aron posible nga masikop ang mga kawatan sa metrohan sa tubig.
