PROVINCE OF CEBU- Isip kabahin sa iyang pagtuman sa saad niadting panahon sa kampanya para sa mga Sugbuanon, gi-anunsyo sa pamunuan ni Cebu Provincial Governor Pamela “Pam” Baricuatro nga ang Kagamhanang Lalawigan sa Sugbo kay magpahigayon og Medical and Surgical Missions sa tibuok buwan sa Agosto isip kabahin sa pagsaulog sa ika-456 nga Founding Anniversary sa probinsya.
Kini ang gipamahayag sa gobernadora niadtong Miyerkules, Hulyo 30 atol sa pakighinabi niini sa mga sakop sa tigbalita nga ang Kapitolyo maglusad sa Serbisyo Karaban sunod buwan nga nakatutok sa major and minor surgical missions kada weekends sa pipila ka mga dapit sa lalawigan ng adunay budget sa P25-milyones nga aprobado sa nakalabayng administrasyon.
Pipila sa mga lugar niini kay mao ang isla sa Bantayan ug Camotes, mga provincial hospital sa component cities sa Bogo, Danao, Carcar, ug lungsod sa Balamban.
Ang schedule sa Serbisyo Karavan kay mao ang musunod:
Agosto 7-8: Isla sa Poro ug Pilar, Camotes
Agosto 15-16: Isla sa Bantayan
Samtang ang schedule sa Libreng Medical ug Surgical Missions kay mao ang musunod:
Agosto 9-10: Cebu Provincial Hospital – Bogo City diin kauban ang City Government of Bogo, Cebu Doctors’ University Hospital, Sui Generis Inc., ERUF ug Cebu Medical Society
Agosto 16-17: Cebu Provincial Hospital – Danao City diin kauban ang City Government of Danao, Chong Hua Hospital, University of Cebu Medical Center ug Cebu Medical Society
Agosto 23-24: Cebu Provincial Hospital – Balamban diin kauban ang Municipality of Balamban, All-Terrain Medical Relief Organization (AMRO), Perpetual Succour Hospital ug Cebu Medical Society
Agosto 30-31: Cebu Provincial Hospital – Carcar City diin kauban ang City Government of Carcar, Vicente Sotto Memorial Medical Center ug Cebu Medical Society
Gihulagway sa Kapitolyo nga usa kina ka large-scale effort nga nagpasiugda og pagtubag sa surgical services ug medical consultations.
Pipila lang sa ilang ipangdalit nga serbisyo mao ang sa major surgeries nga thyroid and breast surgery, hernia repair, gastrostomy, peri-anal abscess treatment, gallbladder surgery, anal fistula and hemorrhoid surgery, orthopedic procedures, and parotid gland (bayook) removal.
Samtang sa minor surgeries kay mao ra ang removal of cysts or small growths (bukol-bukol or bugon).
Priyoridad niini ang mga indigent patients busa limitado lamang ang slots nga igahin tungod sa gipanglantawang baga nga dasok sa mga pasyente nga manghimulos sa libreng serbisyo medical.
