Desedido na si Miss International 1979, ug aktres nga si Melanie Marquez nga gikatakdang mopasaka og divorce gikan sa iyang American husband na si Adam “Randy” Lawyer, human giingong giabusohan siya sa iyang bana sulod sa kapin duha ka dekada.
Sa iyang interbyu, gipaambit ni Melanie ang pipila ka mga insidente sa giingong kapintasan nga gihimo sa iyang bana kaniya, lakip na ang pagsumbag kaniya ug pagtion og pusil sa iyang nawong, ug gidugang niya nga siya giabusohan usab sa pulong ug gitorture sa mental ug pinansyal nga paagi.
Giingon usab sa beauty queen nga nagsumite na siya og sulat sa Bureau of Immigration aron kanselahon ang visa sa iyang bana ug i-blacklist siya gikan sa nasud.
Sa iyang istorya, nahinumdom siya nga sa unang tuig sa ilang kaminyuon, gipugos siya sa iyang bana nga magtrabaho sa usa ka umahan sa Utah, nga hinungdan sa kamatayon sa bata nga iyang gisabak.
Lakip sa mga insidente nga iyang gisaysay niadtong 2022 mao nga giingong gitionan siya og pusil ug gisumbag sa dalunggan samtang natulog, nga nakaapekto sa iyang pandungog.
Samtang niadtong 2025, ang pag-abuso giingong nasubli sa dihang gisumbag siya sa dughan samtang nagsakay sa sakyanan, nga miresulta sa pagkabali sa gusok.
Sa ulahi, nag-file siya og protection order human mibiya sa ilang balay.
