CEBU CITY-Gipangita na karun sa kapulisan sa Abellana Police Station ang mga menor de edad nga nag-viral sa social media human nga dayag kining ‘mihithit’ og solvent o rugby sulod sa public utility jeepney.
Matud sa uploader sa maong video, ang tumong niini arun ipaabot sa kagamhanan sa Sugbo ug mahatagan kini og lakang gumikan nakahatag kini og kakuyaw ingon man alarma sa mga pasahero nga posibleng makabuhat kini og daotan ilabi na nga anaa kini ubos sa impluwensya sa illegal nga lihok.
Gani, naabot kini sa mga konsehal sa dakbayan ug miingon nga ang Cebu City Police Office ug ang Department of Social Welfare and Services mao’y responsable sa pagsubay ug pag-ila sa maong mga bata.
Samtang gikuhaan usab og habig sa Bombo News Team ang Department of Social Welfare and Development Field Office 7 kabahin sa maong isyu, diin gihatagan og gibug-aton ni Regional Director Shalaine S. Lucero nga kung ang mga barangay officials ‘aktibo’ mamahimo nilang mamonitor ang ilang mga gisakupan.
Sama sa mga bata sa video nga matud pa ni Lucero, nga mga biktima lamang kini sa panghitabo sa ilang palibot sama sa napasagdan kini sa ilang kaugalingong ginikanan.
