CEBU – Patay sa disgrasya sa kadalanan ang 15-anyos nga batang lalaki, hinungdan nga naka-aghat kini sa kapulisan sa Argao sa pag-awhag sa mga ginikanan nga dili tugutan ang ilang mga menor de edad nga mga anak nga magmaneho og mga sakyanan mga motorsiklo o mga sakyanan aron malikayan kining matang sa trahedya nga aksidenteng mahitabo.
Gitumbok sa kapulisan ang mga guardian o ginikanan sa menor de edad nga biktima sa pagtugot kaniya sa pagmaneho og motorsiklo.
Sa imbestigasyon nasayran nga ang menor de edad nga biktima nga si Arven John Cayanan, namatay sa samad sa ulo dihang ang gisakyan nga motorsiklo nabangga sa laing motorsiklo sa national highway sa Barangay Bulic, lungsod sa Argao pasado alas 6 sa gabii niadtong Nob. 23.
Dugang pa nga si Cayanan wala magsul-ob og helmet sa dihang nahitabo ang aksidente, ug nagdrayb siya nga walay lisensya kay menor de edad.
Sa imbestigasyon sa kapulisan, ang drayber sa laing motorsiklo nga si Eulieboy Carillo, hingkod na ang pangidaron, nilusot sa pikas lane samtang nisuway sa paglikay sa mga libaong sa iyang kilid sa dalan sa Barangay Bulic.
Ang duha ka biktima daling gidala sa tambalanan aron matambalan.
Apan ang menor de edad nga biktima nga si Cayanan, gideklarar nga dead on arrival sa attending physician sa maong tambalanan.
Samtang ang laing drayber sa motorsiklo nga si Carillo, taga Alambijud, lungsod sa Argao na-admit sa tambalanan aron matambalan.
