Nabarda ug naputol ang labing unang press briefing sa bag-ong tuig ni Mexican President Claudia Sheinbaum sa dihang nitingog ang mga seismic alarm, tungod sa usa ka kusog nga linog sa habagatan ug sentral nga bahin sa Mexico niadtong Biyernes.
Ang maong linog adunay preliminary magnitude nga 6.5 ug ang sentro niini nahimutang duol sa lungsod sa San Marcos sa habagatang estado sa Guerrero duol sa Pacific coast resort sa Acapulco, basi sa national seismological agency sa Mexico.
Tungod sa kakusog sa pag-uyog, ang civil defense agency sa estado nitaho og mga pagdahili sa yuta sa palibot sa Acapulco ug sa uban pang mga highway sa naasoyng dapit.
Dali-daling nanggawas sa kadalanan ang mga residente ug mga turista sa Mexico City ug Acapulco sa dihang nagsugod na ang pag-uyog, ug sumala sa U.S. Geological Survey, ang linog nahitabo sa giladmon nga 35 kilometers, sa lokasyon nga 2.5 ka miles sa amihanan-amihanang-kasadpan sa Rancho Viejo, Guerrero.
Samtang gipadayon ra usab ni Sheinbaum ang iyang press briefing human sa mubo nga panahon ug iyang gipahibalo nga nakig-istorya na siya kang Guerrero Gov. Evelyn Salgado, kinsa niingon nga walay seryosong kadaot nga natala.
