Gipildi sa host team nga Mexico ang South Korea, 1-0, didto sa Estadio Akron, hinungdan nga sila ang nahimong labing unang team nga opisyal nga nakasulod sa Round of 16 sa FIFA World Cup 2026. Kini usab ang unang higayon nga nanguna ang El Tri sa ilang grupo sukad niadtong 2002.
Human sa kamingaw sa unang bahin sa dula diin nakadawat pa og mga “boo” gikan sa mga local fans ang maong team, nausab ang dagan sa dula sa ika-50 nga minuto.
Usa ka cross gikan ni Julián Quiñones ang gi-ulo ni Raúl Jiménez nga nakapugos ni South Korean goalkeeper Kim Seung-gyu sa pagsakmit sa bola.
Apan na-fumble kini ni Kim pagtugpa, hinungdan nga daling nakuha ni Luis Romo ang bola padulong sa usa ka first-touch strike deretso ngadto sa open net aron makuha ang 1-0 nga labaw.
Si goalkeeper Raúl Rangel ang nagselyo sa kadaugan pinaagi sa iyang milagrosong saves sa ulahing bahin sa dula.
Sa ika-86 nga minuto, iyang nasalikway ang kusog nga header ni Cho Gue-sung ug daling nasalo ang bola pipila ka milimetro sa dili pa kini motabok sa goal line.
Bisan pa man og naigo ang iyang nawong sa sapatos ni Yang Hyun-jun, wala gyud buhii ni Rangel ang bola, usa ka kaisog nga milansang sa kadaugan sa Mexico ngadto sa knockout rounds.
