CEBU CITY — Ipaubos gihapon sa isolation ang mga asymptomatic patients gikan sa Sitio Zapatera, Barangay Luz aron masiguro nga nakalingkawas sa sakit nga COVID-19.
Matud sa tigpamaba sa barangay nga si Eldebrian Arañez nga ipasulod sa “transition area” sa sulod sa Barangay Isolation Center ang mga pasyenteng nag-double negative sa virus aron magpuyo sulod sa laing 14 ka adlaw.
Kini base na sa protocol gikan sa Department of Health (DOH)-7 ug sa Cebu City Health Department.
Gibutyag usab ni Arañez nga ipaubos pa sa re-swabbing ang uban pang mga pasyente aron masiguro ang ilang tumang kaayuhan.
Dugang pa sa tigpamaba nga pinaagi sa maong lakang, makahimo og desisyon ang mga barangay officials kung ilibkas pa ba ang Sitio Zapatera sa pagka-lockdown.
Una nang nahimong isyu ang giingong wala pagpaubos sa repeat testing sa pipila ka mga pasyente gikan sa Sitio Zapatera kinsang nagpositibo sa COVID-19.
