PROVINCE OF CEBU-Gipahimangnoan ang publiko nga dili magpaduol o hilabtan ang mga baby sharks nga midagsa sa lungsod sa Santander gumikan adunay balaod ug ordinansa nga nagprotektar niini ug posible usab nga mahimong agresibo gumikan sa nagpadayon nga mating season.
Sa pakighinabi sa Bombo Radyo Cebu News Team kang Mario Ruinita, OIC Regional Director sa Bureau of Fisheries and Aquatic Resources (BFAR) Central Visayas nga usa sa mga hinungdan sa pagtumaw sa mga baby sharks sa maong dapit mao ang breeding season ug timailhan sa nindot nga Marine Biodiversity.
Sa pikas bahin, base sa monitoring sa BFAR Central Visayas wala pa’y nataho nga nadakpan kabahin sa illegal trade sa mga pantalan ug tugpahanan hilabi na sa mga endangered species gumikan sa ilang hugot nga pagbantay diin gisuguro nga walay makalusot nga mga matang sa iligal nga kalihokan.
Dugang ni Ruinita nga hugot usab nga gidili ang paghatag og permit sa mga indibidwal nga mopahigayon og illegal trade sa mga endangered species.
