CEBU CITY — Moabot sa dili moubos sa upat ka toneladang mga basura ang nahipos sa Department of Public Services (DPS) sa Cebu City Government gikan sa mga dagkong sam-ang sa dakbayan atol sa kalag-kalag.
Matud ni DPS Head Engr. Joel Biton nga nagagikan sa sementeryo sa Calamba, Carreta, ug Talamban ang sagad sa mga basurang nahipos sa ilang mga sakop.
Apan giklaro ni Biton nga nagpadayon pa ang consolidation sa mga nahipos nga basura gumikan kay aduna pay mga modu-aw sa mga lubnganan ning liwas sa kalag-kalag.
Dugang pa niini nga migamit sila og preloader nga trak alang sa paghipos sa mga basura apan kung dili kini maigo sa matag suok sa sam-ang, manu-manohon kini og hipos sa mga sakop.
Mipahinumdom si Biton sa mga mo-apas ning kalag-kalag weekend nga dili gihapon magpataka og labay sa mga basura aron dili sitahon sa mga sakop sa DPS ug CESET.
Ubos sa anti-littering ordinance sa dakbayan, multahan og 500 pesos ang first offender o di ba kaha usa ka adlaw nga community service.
Mihangyo si Biton sa publiko nga magtinabangay na lang aron mamentenar ang kahinlo sa mga sam-ang.
Samtang moabot sa 30 ang na-isyuhan og citation ticket sa Cebu Environmental Sanitation and Enforcement Team (CESET) gumikan sa pagpataka og labay sa mga basura, ingon pagpanigarilyo sa publiko human sa paghandum sa kalagkalag.
Matud ni CESET Head Grace Luardo nga nakig-alayon kini sa mga sakop sa DPS alang sa pagsita sa mga makalapas.
Dugang pa ni Luardo nga sa wala pa nagdasok ang mga katawhan sa managlahing mga sam-ang, gipakusgan nila ang information drive sa katawhan aron makalikay sa multa.
