Cebu City-Walay angay nga kabalak-an ang mga nangaligo sa mga beach resorts sa dakbayan sa Lapu-lapu bisan ug dunay mga nakuhang medical waste sa pipila ka mga barangay sa maong dakbayan
Kini maoy gibutyag ni Atty. Ethelbert Ounao, ang City Legal Officer sa dakbayan sa Lapu-lapu. Matud ni Ouano nga ang Mactan channel nga maoy apektadong parte sa dakbayan ang dili lugar nga kaliguanan inay agi-anan lamang kini sa mga sakayang pandagat.
Hinuon gibutyag niini nga angayan gayud nga magmatngon ang mga nagpuyo sa maong dapit sanglit dili gayud luwas nga mangaligo sa maong parte sa dagat gumikan sa mga nakuhang basura.
Sa pagkakaron, gipaabot usa nila ang tubag sa mga tambalanan nga ilang gipadad-an ug suwat diin ila kining gihatagan ug lima ka adlaw alang sa pagtubag.
Giawhag usab sa abogado nga angayang susihon gayud kini sa Department of Environment and Natural Resources (DENR) sanglit duna man silay monitoring niini.
Ang DENR man matud pa ang muhatag ug mga environmental compliance certificate sa mga haulers sa mga hospital wastes aron mamahimo silang accredited ug tugutan nga makignegosyar sa mga tambalanan.
