CEBU – Nakadawat na og hinabang gikan sa Cebu City Government ang mga biktima sa managlahing dagkong sunog nga miigo sa barangay Ermita ug Punta Princesa sa dakbayan sa Sugbo karong buwana.
Kini ang gibutyag ni Atty.Gerry Carillo kinsa maoy nangulo sa Cebu City Disaster Risk and Management Council (CCDRRMC),nga nagpaabot na lang sila sa Sangguniang Panlalawigan nga mosagop og resolusyon nga maggahin alang sa pundo sa cash aid nga ipang-apod-apod ngadto sa mga biktima sa sunog.
Matud pa ni Atty. Carillo nga ubos sa resolosyon makadawat og P20,000 ang matag residente kansang panimalay naguba o nakaangkon og dakong kadaot, samtang P10,000 ang ihatag sa siyudad sa matag tag-iya kansang panimalay nakaangkon lang og gamay nga kadaot.
Samtang sa mga nag-abang na sa ilang mga balay, makadawat sila og P10,000, ug ang matag nag-abang ug pamilya nga nagpuyo ubos sa usa ka atop makadawat og samang kantidad.
Kahinumduman nga ang sunog nga niulbo sa Barangay Ermita niadtong Hunyo 6, 2022,nikabat og kapin sa 700 ka mga residente ug ang insidente sa sunog sa nga miigo sa lima ka sityo sa Punta Princesa niadtong Hunyo 11 nakaapekto sa 819 ka pamilya ug dul-an sa 3,000 ka mga indibidwal nawad-an og panimalay.
