CEBU PROVINCE-Gipang-padlack ang mga bodega sa National Food Authority (NFA) sa Central Visayas, diin sa dakbayan sa Sugbo unom ka bodega ang gisirad-an ug tulo sa Bohol, ingon man sa Negros lakip ang Siquijor.
Kung kahinumduman nga, una nang giawhag ni Gobernador Gwendolyn Garcia ang National Food Authority (NFA) nga ibalik ang pagbaligya sa bugas sa Kapitolyo, aron magpadayon ang mga programa niini.
Matod sa Kapitolyo, ang NFA niluwat og memorandum nga pinetsahan og Pebrero 24, 2024 nga nagmando sa mga regional managers sa ahensya nga hunongon na ang pagpagawas sa mga gipangayo nga rice issuance nga walay pagtugot sa tagdumala niini nga si Roderico Bioco.
Si Gobernador Garcia niingon nga tungod sa maong memorandum, ang NFA-7 dili mobaligya og bugas sa Kapitolyo kon walay pagtugot gikan kang Bioco.
Gipasabot niini nga apektado ang mga programa nga gipatuman sa Kapitolyo tungod niini sama sa school feeding, Sugbo Merkado Barato diin ang Kapitolyo namalit og NFA rice sa ahensya sa tag P25 matag kilo ug ibaligya kini sa mga Sugbuanon sa tag P20 matag kilo ug ang ‘Bugasan sa kababayen-an’, diin manghatag ang Probinsya og napulo (10) ka sakong bugas sa tanang grupo sa kababayen-an sa probinsiya ug ila kining ibaligya sa kantidad nga P27/kilo.
