CEBU CITY-Usa ka dakong salaud ang dili pagpasakay sa mga pasahero nga naay kakulian sa panglawas kun PWD (Person With Disabilities) sa mga pangpasaherong sakyanan.
Kini ang gihimug-atan ni LTO-7 Dir. Victor Caindec human sa reklamo sa usa ka PWD nga si Dionesio kinsang ekslusibong nahinabi atol sa Zona Libre Program sa Bombo Radyo Cebu.
Sigon ni Dionesio nga ang mga bus sa Chan Transit sa lungsod sa Barili ang matud pa kapila na nga higayon nga balibaran ang mga PWD nga musakay tungod kay wala silay kabutangan sa wheel chair.
Matud ni Caindec nga matag sakyanan bisan unsa nga matang , duna gyud kini espesyal nga lingkuranan para sa mga PWD tungod kay kini sila ang giprotektaran sa balaud.
Angayan nga patubagon ang hingtungdan niini ug mitambag si Caindec nga pasumonan kini og idangop sa Land Transportation Franchising and Regulatory Board (LTFRB) aron nga makanselar ang prangkisa.
Mipasalig usab si Caindec nga iya kining ipaabot sa kadagkuan sa hingtungdang ahensya aron nga daling maaksyonan.
Magpabiling abli usab ang sibyaanan sa Bombo Radyo Cebu para sa habig sa Chan Transit ilabina sa ilang mga drivers.
