CEBU – Gilauman ang bagang duot sa mga pasahero sa Cebu North ug South Bus Terminal karung umaabot nga adlawng Biyernes, Oktubre 28, kinsang manguli sa ilahang tagsa-tagsa ka mga probinsiya.
Subay niini, giawhag ni Carmen Quijano, ang general manager sa naasoy nga mga bus terminal, ang mga byahedor nga dili na magdala ug daghan ug bug-at nga mga bagahe, ingon man mga batang gagmay, ug likayan ang pagdala ug kahayopan sama na lang sa iro nga walay hikot, diaper o cage.
Matud pa, mas maayo nga diretso-diretso ang byahe ug dili malangay gumikan kay hilabihan gayud kadaghan ang mga pasahero sa maong adlaw ilabi na nga wala nay restriction sa COVID-19, dili susama sa mga nakalabay nga tuig./
Gidugang pa ni Quijano nga adunay mga blue guards ang mga bus terminals, ingon man adunay i-deploy nga mga sakop sa Civil Security Unit (CSU) gikan sa Kapitolyo ug sa PNP alang sa pagsiguro sa kahapsay ug kalinaw sa mga terminal.
Samtang, positibo usab ang panglantaw niini nga makaya sa mga bus ang pag-accomodate sa mga pasahero nga maka-uli gayud sa ilahang mga probinsiya ug makahandom sa Kalag-Kalag 2022.
