CEBU – Mokabat sa 453 ka mga cellphone nga nakumpiska sa greyhound operations sa Cebu City Jail Male Dormitory ang gipang-guba niadtung Huwebes sa hapon, Agosto 11, 2022.
Matud pa ni Jail Superintendent Metz Milton Placencia, ang bag-ong jail warden, nga iyahang gipanguluhan ang pagguba sa 236 ka mga smartphone ug 217 ka keypad phones, kung diin kini nga mga cellphone nakuha gikan sa sunodsunod nga greyhound operations nga gihimo sukad niadtong 2021.
Gipangguba ni Placencia ug ubang mga jail officer ang mga nakumpiska nga cellphone gamit ang mga puthaw nga bar isip kabahin sa gihingusgan nga operasyon sa nahauna batok sa pagdagsang sa mga kontrabando sa pasilidad nga nahimutang sa Barangay Kalunasan, dakbayan sa Sugbo.
Subay niini, gibutyag sa opisyal nga in-place ang operation sa BJMP, apan daghang makalusot, gumikan kay dili kini ipa-agi sa gate, inay gipanglabay kini pasulod o ang uban nag-gamit og drone, hinungdan nga maghimo silag ordinansa nga no flying zone ang dool sa Cebu City Jail Male Dormitory.
Nasayran nga ang mga personahe sa city jail sagad mopahigayon og greyhound operation kausa sa usa ka buwan o kausa sa duha ka buwan sa Philippine Drug Enforcement Agency sa Central Visayas.
Kung kahinumduman si Placencia milingkod isip warden sa city jail niadtong Agosto 1, 2022, kung diin siya ang gihulip ni Jail Superintendent Jose Rusylvi Abueva.
