Nakahimo og bag-ong titulo sa Guinness World Records ang usa ka grupo sa mga chef sa Guatemala human sila nagtinabangay aron sa paghimo sa kinadak-ang fiambre salad nga may gibug-aton nga 1,960 ka kilo.
Ang record attempt gipahigayon sa Guatemala City ug giorganisar sa kompanya sa pagkaon nga Toledo Alimentos. Diin kapin sa 4,000 ka libra sa nagkalain-laing klase sa karne ug mga utanon ang gisagol uban sa dressing aron makuha ang opisyal nga titulo isip “kinadak-ang fiambre salad.”
Lakip ang mga sagol niini ang mga itlog, cold cuts, mga sausage, mais, sili, letsugas, sibuyas, ug uban pang klase sa karne ug mga utanon.
Ang fiambre usa ka klase sa salad nga gilangkuban sa nagkalain-laing cold cuts, mga utanon, ug uban pang mga sagol; kasagaran kining giandam sa Guatemala matag Adlaw sa mga Santos (*All Saints’ Day*) ug Adlaw sa mga Kalag (*All Souls’ Day*).
Ang pagsulay sa paghimo og rekord gihimo pipila ka adlaw sa wala pa ang Adlaw sa mga Santos sa Nobyembre 1 ug ang Adlaw sa mga Kalag sa Nobyembre 2—mga okasyon nga kasagarang nalambigit sa pagkaon nga *fiambre*.
Human kini gitimbang ug gisusi pag-ayo sa usa ka adjudicator gikan sa Guinness World Records, gikumpirma ang gibug-aton sa salad nga nakabuak sa rekord.
Ang dakong gidaghanon sa pagkaon wala mausik, kay human sa beripikasyon, ang *fiambre* gipang-apod-apod ngadto sa mga tawo nga mitambong sa kalihokan.
Gawas sa pagsulay sa paghimo og rekord, ang maong kalihokan naglakip usab og *live music*, mga demonstrasyon sa tradisyonal nga paghabol, ug uban pang mga kalihokan nga nagpakita sa kultura sa Guatemala.
