CEBU-Gikatahong usa sa mga gilauman nga mosaksi sa Pasigarbo sa Sugbo festival nga gikatakda karong umaabot nga Agosto 25 sa Cebu City Sports Center (CCSC) kay ang mga delegasyon gikan sa St. Petersburg, Russia.
Gilauman ni Cebu Governor Gwendolyn Garcia ang maong mga bisita agi’g tubag sa pagbisita usab sa ilang lugar.
Ning higayuna, ang gobernadora nipahigayon og multi-sectoral conference sa social hall sa Kapitolyo aron tukion ang ilang pagpangandam sa “festival of festivals.”
Diin atol sa tigom, si Garcia nipahibalo sa ilang hiniusang pagsuporta sa pagpahigayon sa kalihukan sa CCSC bisan pa sa pagsupak ni suspended Cebu City Mayor Michael Rama.
Sa bahin niini, ang kagamhanan sa dakbayan sa Sugbo ubos ni acting Mayor Raymond Alvin Garcia niingon nga ilang ipakatap ang 279 ka traffic personnel, walo ka mobile patrols, 124 disaster risk reduction personnel, 244 ka local school board personnel nga motabang sa civil works, ug 268 ka maintenance personnel alang sa installation sa 306 ka portalet ug portabat.
Mokabat sa 1,233 ka mga pulis usab ang ipadala sa Police Regional Office (PRO 7) arun sa paghatag og seguridad sa maong kalihukan, ingon man ang Cebu Police Provincial Office, nga magpahulam og 12 ka mga sakyanan sa Sugbo Cop, napulo ka mga pulis nga motorsiklo, 150 ka security escort, ug 400 ka mga kapulisan.
Ingon man nga motampo ang AFP-Joint Task Group ug Bureau of Fire Protection alang sa pagsiguro sa kalihokan.
Gawas niini, ang Philippine Navy ug Philippine Coast Guard mogamit usab sa ilang mga barko sa paghatod sa maong mga contingents gikan sa Cebu islets ug ilang props ngadto sa mainland Cebu.
Hinungdan nga dakong ginhawa ug pasalamat ni Gwendolyn Garcia sa bug-os nga suporta nga gihatag sa Sugbo alang sa Pasigarbo sa Sugbo sa Probinsya sa Sugbo.
Kahinumduman nga gisupak ni suspended Cebu City Mayor Michael Rama ang pagpahigayon sa Pasigarbo sa Sugbo sa Kapitolyo ug matud niini nga dili makatarunganon ang pagpahigayon sa Pasigarbo sa Sugbo sa CCSC.
Apan, si Acting Mayor Garcia kay walay nakitang rason nganong dili tugotan ang Pasigarbo sa Sugbo 2024 nga ipahigayon sa Cebu City Sports Center sama sa kusganong pagsupak ni Mike Rama.
