CEBU – Gibutyag ni Dr. Rene Josef Bullecer, usa ka medical doctor, nga makamugna og kalibog sa katawhan ang mga pamahayag sa hingtungdang ahensya kalabot na sa kasamtangang giatubang nga pandemya sa nasod.
Kini human sa milabayng semana, adunay pamahayag ang Department of Health (DOH) nga walay gilauman nga pagsaka sa kaso sa Covid-19 karong panahon sa campaign period hangtod na mahuman ang eleksyon.
Apan, sukwahi kini sa nakita sa mga eksperto nga mas mosaka pa ang kaso sa makamatayng sakit inig human sa eleksyon gumikan na usab sa nagkadaiyang aktibidad human sa eleksyon diin wala na masunod sa katawhan angminimum public health standard protocols.
Matod pa ni Bullecer, nga daw ang departament sa panglawas maoy nagbuot kung kanus-a mogawas o mosulod ang makamatay nga kagaw ug daw sa nahug nalang kini og kataw-anan.
Apan, gitataw sa doctor nga usa sa mga timalihan og nganong naka-ingon ang mga eksperto nga adunay dakong pagsaka sa kaso sa virus inig human sa eleksyon, mao ang nahitabong libreng konsyerto sa Sugbo niadtong nakalabay nga semana kung diin nagpunsisok ang katawhan og tataw nga wala na masunog ang health protocols.
Tino pa niini , nga kung wala lay mga superspreader events nga mahitabo posibleng matinuod ang pamahayag sa DOH nga dili mosaka ang kaso sa virus ingon man mabalik na kita sa normal.
Giklaro usab ni Bullecer nga kinahanglan nga magpabooster ang katawhan gumikan limitado lang ang panahon nga mohatag og proteksyon ang mga bakuna.
Angay usab nga lauman sa katawhan ang mga dugang booster sa pipila ka buwan gumikan wala paman naperpekto sa mga eksperto ang bakuna nga makahatag og lifetime protection sa usa ka indbidwa; batok sa makamatay nga kagaw.
