Giawhag sa mga eksperto sa balaod ang Senado nga ipadayon ang impeachment trial batok kang Bise Presidente Sara Duterte.
Nahitabo kini human ang Senado, nga naglihok isip impeachment court, gibalik ang reklamo ngadto sa House of Representatives human ang majority sa 18 ka mga Senator-judges mibotar pabor ug lima lang ang misupak sa pagpabalik sa reklamo ngadto sa Kamara tungod sa giingong constitutional infirmities nga kinahanglang sulbaron.
Sa usa ka pamahayag, ang Philippine Constitution Association (PhilConsa) nga gipangulohan sa chairman nga si retired Chief Justice Reynato Puno nga gitumbok nga ang aksyon sa Senado nagpatunghag constitutional concerns mahitungod sa integridad sa proseso sa impeachment.
Apil na niini ang grave abuse of discretion, kon ang Senado ba ilegal nga nagsuspenso sa hurisdiksyon niini isip impeachment court.
Giila usab sa grupo ang circumlocutory delay, kung ang pagpatuman sa ilang giingon nga bag-ong mga kinahanglanon nga wala sa Konstitusyon o mga lagda sa Senado katumbas sa usa ka circumlocutory device nga gidisenyo aron malangan o tapuson ang trial.
Kalabot niini, gipahinumdoman sa grupo ang Senado nga sa higayon nga mag-convene na kini isip impeachment court, dili masuspenso ang hurisdiksyon niini pinaagi lang sa procedural acts.
Gihimong pananglitan sa Philconsa ang kaso sa Republic vs Sandiganbayan niadtong 1997, diin gideklarar sa Korte Suprema nga ang hurisdiksyon, nga legal na nga nakuha, dili mawala tungod lang sa mosunod nga mga panghitabo, kondili magpadayon hangtod nga hingpit nga masulbad o ma-dismiss ang kaso.
Gitumbok usab sa grupo nga ang prinsipyo sa pagpadayon sa hurisdiksyon usa ka establisado nga praktis, lakip na ang impeachment trial ni kanhi US President Bill Clinton, nga mao ang modelo nga gigamit sa proseso sa impeachment sa nasud.
Gitataw usab ni Puno nga ang impeachment, nga maoy mekanismo sa katawhan sa pagpatuman sa tulubagon sa mga opisyal sa publiko, dili angay babag sa mga imbento nga pamaagi o partisan nga maniobra.
Sa kataposan, ang Philconsa miapelar sa Senado nga ipatuman ang ilang katungdanan sa konstitusyon ug ipadayon ang impeachment trial base sa konstitusyon ug lagda sa balaod.
