CEBU CITY-Makadawat ang mga empleyado sa Cebu City Hall og bonus nga P35,000 nga adunay dakong usbaw gikan sa P20,000 nga bonus sa milabay nga tuig.
Gipahibalo kini sa Bise Mayor sa syudad sa Sugbo nga si Raymond Alvin Garcia atol sa flag-raising ceremony sa City Hall kagahapong adlawa.
Gihatagan og gibug-aton ni Garcia ang kamahinungdanon sa dinaliang pagpangandam alang sa bonus, nga nag-awhag kang Cebu City Administrator Collin Rosell, Budget and Finance Officer Jerone Castillo, ug City Treasurer Mare Var Reyes sa pagpadali sa proseso.
Ang Bise Mayor nagkanayon nga ang bonus ihatag sugod sa bulan sa Nobiyembre hangtod Disyembre, nga magtugot sa mga empleyado sa pagsaulog sa Pasko uban ang dugang pinansyal nga suporta.
Dugang niya nga ang pundo alang sa bonus kuhaon gikan sa kinatibuk-ang pundo sa siyudad.
Apan siya miingon nga ang mga job order workers dili kabahin sa maong incentive.
