CEBU CITY – Duha ang patay samtang duha usab ang samdan human sa nahitabong pagpamusil sa mga empleyado sa usa ka coffee shop sa F. Ramos Street, Brgy Cogon Ramos ning dakbayan sa Sugbo.
Ang mga biktima mao sila si John Michael Hermoso, 29 anyos, residente sa Brgy Apas kinsang usa sa mga tag-iya sa The Good Cup Coffee Company , Jerome Amada, dining staff sa maong coffee shop, Kis Katy Ramos, 21 anyos, residente sa Brgy Pardo ug cashier sa coffee shop ug si Sherwin Rivera, 23 anyos residente sa Brgy Mambaling cashier usab sa maong shop. Dead on the spot si Hermoso samtang dead on arrival sa tambalanan si Ramos. Padayon usab nga na confine sa tambalanan sila si Rivera ug Amada.
Matud ni Police Lieutenant Elston Dabon, ang deputy commander sa Abellana Police station kinsang first responder sa insidente nga pasado alas-onse kagabie sa dihang kalit lang nga gipamusil sa usa ka gunman ang mga biktima . Nasayran nga paingon na manira ang maong coffee shop sa dihang kalit lang nga misulod ang gunman.
Unang gipusil sa gunman mao si Rivera , apan nakahigayon kini nga madagan pagawas sa coffeeshop ug makapangayo ug tabang samtang ang tulo niini ka mga kauban ang naa sa sulod sa shop. Wala usab ma identify sa mga biktima ang nawong sa gunman gumikan kay nakasuot kini og fullface nga helmet. Human sa insidente, dali nga mibiya sa lugar ang suspek sakay sa yellow nga motorsiklo nga nag paabot kaniya sa gawas sa coffee shop.
Basi sa inisyal nga imbestigasyon sa kapulisan nga dako ang posibilidad nga gituyo gayud ang maong pagpamusil apan wala pa matino kung unsa gayud ang motibo sa krimen.
Samtang nasuta nga usa sa mga namatay nga si Ramos ang nakatakda unta nga mo gradwar karong Hunyo 2019 sa kursong BA Psychology sa University of the Philippines-Cebu.Sa giluwatan nga pamahayag sa College Editors Guild of the Philippines Cebu, nangayo sila karon ug hustisya alang kang Ramos ug sa mga kaubanan niini nga mga biktima sa maong pagpamusil.
