CEBU CITY-Wala pa makadawat sa gisaad nga Charter Day bonus ang mga empleyado sa dakbayan sa Sugbo karong adlawa Pebrero 24, tungod kay tukion pa ang kataposang kantidad.
Kini human si Cebu City Councilor Noel Wenceslao, ang chairman sa committee on budget and finance, niingon nga wa pa silay nadawat nga proposal gikan sa City Council labot sa charter day bonus ug padayun pa kining tukion.
Dugang ni Wenceslao nga dili pa nila makompirmar ang bisan unsang kantidad tungod kay nagpadayon pa ang paghimo sa maong proposal.
Sa pikas bahin, gitino ni Cebu City Vice Mayor Raymond Alvin Garcia, usa ka adlaw sa wala pa ang Charter day sa Dakbayan, nga ang executive department wala pa makasumite sa mga dokumento sa konseho nga gikinahanglan alang sa supplemental budget ordinance, nga naglakip sa Charter Day bonus ug uban pang mga butang.
Hinuon iyang gipasalig nga ang Charter Day bonus mahatag sa mga empleyado bisan pa man sa pagkalangan sa supplemental budget ordinance.
Gipaabot ni Garcia nga madawat ang supplemental budget ordinance karong Pebrero 28.
Matod niya ang iyang gisugyot nga Charter Day bonus nga kantidad nga P25,000 gikonsiderar; bisan pa, kini nga numero ubos gihapon sa pagtugot sa konseho.
