PROVINCE OF CEBU-Aprobado na sa Cebu Provincial Board (Sagguniang Panlalawigan) ang Supplemental Budget No. 3 nga naglatid sa alokasyon sa kapin P79.6-milyones nga para sa appropriations sa Christmas Bonuses sa mga empleyado sa kagamhanang lalawigan.
Napasar kini sa una, ika-duha, ug ikatulong pagbasa sa samang adlaw kagahapon, Lunes, Disyembre 16, 2024 subay sa mando sa pagpadali ni Cebu Provincial Governor Gwendolyn Garcia.
Diin sa specification sa maong budget kay maglatid kini sa P40,000 Christmas bonus sa 1,285 ka mga empleyado sa Kapitolyo kinsa appointed staffs, permanent workers, casual empleyado, ug kadtong mga co-terminus status.
Sa maong kantidad, ang P25,000 kay masakop sa Collective Negotiation Agreement (CNA) incentive, samtang ang nahabilin nga P15,000 ipasaka batok sa Service Recognition Incentive (SRI) nga gitugutan sa Administrative Order No. 27 gikan sa Office of the President.
Dugang P5,000, nga nahatag na sa annual budget, idugang usab isip Productivity Enhancement Incentive (PEI).
Samtang ang kaping 1,880 ka mga job order employees kay makadawat sab sa P15,000 isip Premium and Gratuity Pay subay gihapon sa COA-DBM Joint Circular No. 2, series of 2020.
Ang mga empleyado sa Kapitolyo naglakip sa mga personahe gikan sa executive uglegislative branches, ingon man mga kawani nga nalambigit sa mga revenue-generating enterprises ug social services.
Apil na niini ang mga operasyon gikan sa North ug South Bus Terminals nga gipadagan sa Kapitolyo, ingon man sa 16 ka provincial ug district hospitals.
