PROVINCE OF CEBU- Gipakusgan sa Kagamhanan sa Probinsiya sa Sugbo ang ilang mga paningkamot aron mahunong ang pagkamatay tungod sa dengue sa tuig 2030.
Tungod niini, miapil ang mga empleyado sa Kapitolyo sa usa ka seminar bahin sa pagpugong ug kontrol sa dengue nga gipahigayon sa Capitol Social Hall niadtong Septiyembre 11, 2025.
Ang seminar nga giulohan og “Bite Back: Cebu’s United Front Against Dengue,” gipangulohan ni Capt. Erica Tania Davillo, usa ka doktor sa Armed Forces of the Philippines ug Harvard graduate. Siya usab ang chair sa Philippine Medical Association’s Ad Hoc Committee on Dengue Advocacy.
Gipasiugdahan sa Philippine Medical Association, Cebu Medical Society, ug Pocari Sweat, ang kalihokan nagtumong sa pagpataas sa kahibalo ug paghatag gahum sa mga empleyado sa Kapitolyo sa labing bag-ong pamaagi sa pagdumala sa dengue.
Sa sesyon, gipasiugda ni Capt. Davillo ang pagkadinalian sa hiniusang aksyon batok sa dengue, nga mao ang pinakapaspas nga pagkaylap nga sakit nga dala sa lamok sa kalibutan ug endemic na sa kapin sa 100 ka nasod.
Ang Probinsiya sa Sugbo nagpabilin nga labing grabeng naigo sa Central Visayas karong tuiga, nga nakatala og 3,640 sa 7,567 ka kaso sa dengue sa rehiyon.
Gipasalamatan ni Gobernador Pamela Baricuatro si Capt. Davillo ug ang mga medikal nga grupo sa ilang pagpaambit sa kahibalo ug tabang sa pagpahugot sa pakigbatok sa dengue sa probinsiya.
Uban niining hiniusang paningkamot, tumong sa Sugbo nga mapanalipdan ang katawhan ug makatampo sa global nga paningkamot nga matapos ang kamatayon tungod sa dengue sa tuig 2030.
