CEBU-Nagpahigayon og panagtigom ang mga exorcist dinhi sa Sugbo subay sa pagdaghan sa mga insidente sa gikatahong nasudlan og mga dautang espiritu o evil possession.
Gibutyag ni Rev. Fr. Sulpicio ‘Pepe’ Vincoy, exorcist priest ug spiritual director, nga na-obserbaran nila karun ang paghuyang sa pagtuo sa kadaghanan.
Matud pa, ang maong national gathering kay nagtinguha sa paglingkawas sa mga tawo gikan sa pagkaulipon sa daotan.
Dugang pa ni Fr. Sulpicio nga aktibo ang mga exorcist dinhi sa Sugbo ug lukop nasud arun nga matul-id ang mga bating kinaiya ug sayop nga mga pagtulun-an sa komunidad.
Kahinumdoman nga niadtong nakalabay nga semana kay nag-viral sa social media ang video kung diin makita ang babaye ug lalaki nga gikatahong gisudlan og dautang espiritu sulod mismo sa simbahan sa Lindogon sa lungsod sa Sibonga.//
Gihulagway sa mga nakasaksi nga misyagit ug hilabihan ka kusgan sa duha atol sa maong posibli nga evil possession sulod sa shrine.
Nagkanayon si Sulpicio nga usa sa mga sagad sa hinungdan sa demonic possession sa usa ka lugar mao ang presensya sa ocult practices.
Gidugang ni Fr. Sulpicio nga wala gisuportahan sa simbahan ang presensya sa pagpatambal og binisaya, fortune-telling, ug paganism sama sa pag-ampo sa bato ug uban pa.
Ang pag-ampo ug paglig-on sa pagtuo, ingon man ang paghunong sa pagpakasala ang makatabang sa paglikay sa mga dautang elemento.
