CEBU CITY-Gipatawag sa Cebu City Police Office (CCPO) ang tanang mga fraternities ug sororities sa dakbayan sa Sugbo human nga misurindir ang upat ka mga suspek sa hazing incident nga gikamatay sa usa ka tinun-an.
Gibutyag ni Police Colonel Ireneo Dalogdog, ang director sa CCPO, nga ilahang gihangyo ang maong mga grupo nga makig-alayon ug musuporta kanila batok niining mga insidente sa hazing.
Matud pa, mapasalamaton kini nga misanong ang maong mga grupo sa ilahang hangyo.
Samtang, gipahibalo usab ni Police Colonel Dalogdog nga posibli sila nga ipatawag sa Senate Blue Ribbon Committee gumikan sa maong insidente ug posibli nga lakip sa ipatawag ang mga opisyal sa Tau Gamma Phi sa usa ka unibersidad.
Kahinumdoman nga niadtong Miyerkules, Marso 8 sa gabii, misurindir ang upat ka mga suspek sa kamatayon ni Ronnel Baguio, sa usa ka marine engineering student, human sa ilahang gipahigayon nga hazing niadtong Disyembre 10, 2022.
Gitino ni Dalogdog nga adunay lima ka mga suspek sa maong insidente apan giingong nagduha-duha pa ang usa nga mupatim-aw gumikan usab sa kahadlok.
