CEBU – Gipahibawo ni Bohol Governor Aris Aumentado atol sa 2nd Provincial Peace and Order Council (PPOC) meeting nga gipahigayon sa Ceremonial Hall, New Capitol Building, ang pormal nga pagsurender ni Elizar Samorano Nabas alyas “Kepli,” “Yok-Yok,” “Dido,” “Jinggoy ,” ug “Nonoy,” deputy secretary sa Bohol Party Committee sa CPP-NPA.
Si Nabas, nga taga Barangay Rizal, Batuan, Bohol 30 na ka tuig sa underground nga kalihukan.
Nagsugod ang iyang pagkalambigit niadtong 1992 sa dihang 16 anyos pa lang kini ug nahimong team leader sa semi-legal team (SLT) sa Batuan, Bilar, ug Sevilla, ug usa ka acting Commanding Officer (C.O.) sa usa ka platun nga adunay daghang engkwentro sa mga tropa sa 12IB nga nadestino kaniadto sa Bohol ug sa 47IB sa Philippine Army.
Gikalipay ni Governor Aumentado nga nagbunga ang inisyal nga mga paningkamot aron tapuson ang lokal nga armadong panagbangi sa mga komunista sa Bohol.
Gitug-an sa gobernador nga ni-surrender si Elizar Nabas sa Batuan sa gobyerno pinaagi niya ug ni Batuan Mayor Antonio “Dodo” Jumawid.
Ang negosasyon sa pagsurender ni Nabas nagsugod niadtong Septiyembre 14, 2022 diin ang iyang pormal nga custodial debriefing sa PNP Intelligence Unit and the Military (MICO ug 47th IB) gihikay ni Mayor Jumawid ug sa buhatan sa gobernador, pinaagi sa Office of the Provincial Social welfare and Development (OPSWD) pinaagi ni Mita Tecson ug sa Executive Assistant for End Local Communist Armed Conflict (ELCAC) Romy Teruel niadtong Septiyembre 30, 2022.
Gihinumdoman sa gobernador ang panahon nga ang probinsiya gideklarar nga insurgency-free niadtong Pebrero 11, 2010, ubos sa katungdanan sa iyang amahan, ang kanhi gobernador sa Bohol nga si Erico Boyles Aumentado.
