Adunay linahi nga pakulo ang usa ka pet cafe sa Chengdu, Sichuan province sa China kung diin pwedeng himoong panda ang mga iro pinaagi sa pagkolor niini.
Kinahanglang mobayad og 1,500 Yuan (dul-an 11,000 pesos) ang customer aron koloran og itom ug puti ang mga iro aron mapareha sa panda ang hitsura niini.
Daling nadani ang mga netizens sa maong cafe sa dihang nag-post og hulagway ang unom ka chow-chow dog nga nahimong panda ang tag-iya sa cafe nga si Lu Yunning.
Matud ni Lu nga trip lang nila ang mamahimong lahi itandi sa mga nanglaray nga pet cafes sa ilang lugar.
Moabot sa 70 ngadto sa 80 ka costumers matag adlaw ang mibisita sa maong cafe ug nadoble pa kini human nag-post si Lu sa iyang mga iro online.
Apan mas interesado sila, matud pa, nga magpakuha sa og mga hulagway kauban ang ilang mga iro inay magpakolor sa ilang mga pet.
Gisiguro usab ni Lu nga luwas ug dili makadaut ang mga kolor nga ilang gigamit sa mga iro.
Wala hinuon girekomendar sa animal rights group nga PETA nga pakoloran ang mga iro.
Matud sa PETA Vice president for Asia nga si Jason Baker nga makadaut sa pamanit, mata, ilong, ug mata ang chemial dyes nga gipangbutang sa mga iro.
Dugang pa nga tambag ni Baker nga likayan sa publiko ang mga negosyo nga manamastamas sa mga kahayupan alang sa pagpangwarta.
Gisaway usab sa mga netizen ang gibuhat ni Lu diin, matud pa, usa kini ka matang sa abuso ngadto sa mga kahayupan. (Reuters)
