Gipasiugda ni House prosecutor Jonathan Keith Flores nga ang mga kabtangan nga nagkantidad og milyon-milyon ka pesos, nga giingong wala gideklarar ni Bise Presidente Sara Duterte sa iyang Statement of Assets, Liabilities and Net Worth (SALN), dili gamay nga kantidad alang sa ordinaryong Pilipino.
Atol sa pagdungog sa Senate impeachment court, gipresentar sa prosekusyon ang mga dokumento bahin sa duha ka kabtangan nga adunay kinatibuk-ang kantidad nga 9.45 ka milyon ka pesos, nga parehong nakarehistro sa ngalan sa bana sa Bise Presidente nga si Manases Carpio.
Lakip niini ang usa ka kabtangan nga may gidak-on nga 379 square meters sa Matina, Davao City, nga gipalit sa kantidad nga 6 milyon pesos niadtong Hulyo 2024, ug laing kabtangan sa Island Garden City of Samal nga nagkantidad og kapin sa 3.4 milyon pesos, nga gipalit niadtong 2018.
Sumala sa mga saksi gikan sa Registry of Deeds, walay nakit-an nga deklarasyon alang niini nga mga kabtangan diha sa mga SALN ni Duterte.
Apan, gipadayon sa depensa ang argumento nga ang kabtangan sa Matina mahimong apil na sa mga kabtangan nga iyang gideklarar.
Kini nga mga dokumento kabahin sa mga ebidensya sa prosekusyon kalabot sa mga alegasyon nga dili kompleto ug dili tinuod ang pagbutyag sa mga kabtangan nga gipanag-iya sa Bise Presidente ug sa iyang bana.
