CEBU CITY — Subsob na ang pagpangandam karon sa Lapu-Lapu City Government ug sa National Quincentennial Committee ang pipila ka mga makasaysayanong kalihukan dungan sa ika-500 nga anibersaryo sa “Kadaugan sa Mactan” karong semanaha.
Usa niini mao ang pag-abli sa Philippine Quincentennial Museum karong adlawa diin nahimutang kini sa Museo Sugbo, dakbayan sa Sugbo.
Bida sa maong museo ang mga exhibits nga nagpakita sa mabulukong kasaysayan sa Pilipinas sa wala pa naghari ang mga Espanyol.
Ipakita usab sa exhibit nga gipasiugdahan sa National Historical Commission of the Philippines (NHCP) ang partisipasyon sa mga Pilipino sa unang circumnavigation sa kalibutan.
Samtang hugot nga seguridad ang gipatuman sa Mactan Shrine isip venue sa talagsaong reenactment sa nahimong sangka nilang Datu Lapu-Lapu ug Ferdinand Magellan, usa ka Portuguese conqueror.
Nasayrang pulos mga local actors ang nagdala sa mga mahinungdanong karakter atol sa maong re-enacment nga ipahigayon karong Abril 27 sa hapon.
Gawas sa mga local officials, lauman usab ang pagtambong sa pipila ka mga mahinungdanong opisyal sa kagamhanan sama ni Executive Secretary Salvador Medialdea isip representante sa Malacañang.
Hinungdan nga namahayag ang usa ka local history advocate nga si Atty. Clarence Paul Oaminal nga dili gayud mosurender ang tanang mga Pilipino taliwa sa mga hagit aron makab-ot ang tinuod nga kadaugan.
Kini sama lang sa nahimong pagdaug ni Lapu-Lapu sa nahitabong gyera sa Mactan Island niadtong 1521 bisan pa man sa kalimitado sa ilang mga kahimanan.
Sumala pa ni Oaminal nga kinahanglang hatagan og bili sa matag usa ang mahinungdanong bahin sa kasaysayan isip pagsaludo usab sa mga bayaning nibuhis sa ilang kinabuhi alang sa kagawasan sa nasud. ###
