CEBU CITY – Nagpadungug-dungog ang mga kandidato sa pagkakongresista sa unang distrito sa Cebu Province atol sa “Debate sa Bombo 2019”.
Kini human nga nag-atubangay silang Dr. Ron del Mar ug Pastor Solomon Boy Paypa aron sa pagtubag sa mga isyu nga makaapekto sa mga lumulupyo sa 1st district ilabi na sa dakbayan sa Talisay.
Apan wala mitambong sa maong debate ang kasamtangang mayor sa Talisay City ug kandidato sa pagkakongresista nga si Eduardo Gullas gumikan sa wala matino nga rason.
Una nga gitataw ni Dr. Del Mar nga importante nga ipakita ang kahimtang sa panglawas sa usa ka kandidato alang sa kapasidad niini sa pagdumala sa mga konstitwente.
Samtang gipadayag ni Pastor Paypa ang intensyon sa iyang pagdagan gumikan kay, matud pa, wala maatiman sa nangaging mga kongresista ang panginahanglan sa mga kabus sulod sa mga katuigan.
Nagtinubagay ang mga kandidato sa mahinungdanong isyu nga nalambigit ang katawhan atol sa Debate sa Bombo 2019.
TALISAY DISTRICT HOSPITAL
Gihatagan og pagtagad sa kandidato nga si Dr. Ron Del Mar ang importansya sa maayong panglawas alang sa mga konstitwente sa 1st District kung makadaug kini sa pagka-kongresista.
Matud ni Del Mar nga nangangkon ang mga Gullas sa pagpalambo sa Talisay District Hospital gumikan kay ang national government man ang mihatag og pondo alang sa pag-develop niini.
Apan mitubag si Pastor Solomon Paypa nga makahimo si Del Mar sa paghatag og serbisyo pinaagi lang sa expertise niini sa natad sa medisina sanglit walay nag-exist ang pagpanlimbong ug korapsyon sa kongreso.
GRAFT AND CORRUPTION
Midepensa usab si Del Mar nga mahimo kini pinaagi sa “lobbying” sa pondo ug impluwensya ngadto sa mga ahensya sa gobyerno.
Gipadayag usab ni Pastor Paypa ang pagkasupak niini sa mga proyekto gumikan kay posible kining mosangput sa anomaliya.
Kini human nga iyang nasaksihan ang pag-gisi sa cheke nga mibalor og P10-million isip transaction sa usa ka shipping company nga gustong mogamit sa Talisay City Port.
Giklaro usab ni Paypa nga ang Philippine Port Authority maoy nanag-iya sa Talisay City Port ug dili ang kagamhanan sa maong dakbayan.
Giuyunan usab ni Dr. Del Mar ang maong pamahayag gumikan kay mahimo ang graft and corruption sa bisan unsa nga matang.
ILEGAL NGA DRUGAS
Samtang nasagmuyo pag-ayo si Dr. Del Mar sa problema sa taas nga distribusyon sa ginadiling drugas sa 1st district bisan pa man sa kalambuan niini.
Matud ni Del Mar nga wala gitagad sa mga Local Government Units ang pagsulbad sa ginadiling drugas gumikan sa pagka-drug protector o di ba kaha nagpakabuta-bungol lang sa mga lider.
Gidugang usab ni Pastor Paypa nga kung nalambigit ang nangulo sa LGU sa ilegal nga drugas, dili kini kalihok sa pagsulbad. Nakita usab ni Paypa nga adunay negligence of responsibility ang lider kung mapamatud-an man.
Nahimong malinawon ang debate gumikan kay napirmahan nilang Del Mar ug Paypa ang peace covenant.
Nagtinguha ang “Debate sa Bombo” sa pagtubag sa mga isyu nga gi-atubang sa mga kandidato diin makatabang kini alang sa botante kinsa nga mopili sa ilang lider karong piniliay.
