Nagpahinumdom ang pamunoan sa Philippine National Police (PNP) sa tanang mga opisyal sa pulisya, lakip na ang mga content creator ug mga aktibong tiggamit sa social media, nga dili manghilabot sa mga butang nga politikal ug magpabilin nga matinud-anon sa ilang mandato sa pagpatuman sa balaod ug pagmintinar sa kahusay sa nasud.
Sa usa ka pahayag, si PNP Chief General Jose Melencio Nartatez Jr. miingon nga walay luna alang sa politika sa han-ay sa pwersa sa kapulisan ug dili kini kabahin sa ilang katungdanan nga manghilabot sa mga panagbangi sa politika nga naglungtad karon sa nasud.
Sumala ni Nartatez, ang mga opisyal sa pulisya kinahanglan nga mag-focus sa pagpatuman sa balaod ug paghatag og seguridad sa publiko imbes nga moapil sa mga debate ug argumento sa social media.
Gipasiugda sa hepe sa PNP nga samtang ang ordinaryong mga lungsuranon adunay katungod sa pagpahayag sa ilang mga opinyon, lahi ang sitwasyon sa mga opisyal sa kapulisan tungod kay ang bisan unsang publikong pahayag nga ilang gihimo mahimong isipon nga posisyon sa tibuok organisasyon.
Tungod niini, giawhag ni Nartatez ang tanang mga personahe nga magpakita og disiplina ug pagpugong sa paggamit sa social media aron malikayan ang bisan unsang impresyon sa pagpihig ngadto sa bisan unsang kampo sa politika.
Sa samang higayon, nanawagan usab ang PNP sa publiko nga mahimong kritikal sa impormasyon nga makita sa internet ug likayan ang pagpaambit sa wala mapamatud-i nga impormasyon.
Mahinumduman nga ang Cybercrime Investigation and Coordinating Center o CICC bag-o lang usab nagpasidaan batok sa pagkaylap sa sayop nga impormasyon ug disinformation nga mahimong hinungdan sa kalibog ug dugang nga pagpainit sa kasamtangang tensyon sa politika sa nasud.
Sa katapusan, gipasalig sa PNP nga magpabilin sila nga naka-focus sa ilang panguna nga katungdanan sa pagmintinar sa kalinaw ug kahusay ug dili maapil sa bisan unsang panagbangi o kontrobersiya sa politika.
