Padayong gipanawagan ang mga magtutuong Katoliko nga ipadayon ang paghalad sa mga pag-ampo alang sa mga cardinal, sa ilang pagsulod sa conclave o panagtapok sa mga cardinal aron mopili og bag-ong Santo Papa karong adlawa, Mayo 7.
Kini aron ang matag usa kanila magiyahan ug makapili og bag-ong Santo Papa ubos sa giya ug direksyon sa Espiritu Santo.
Sama nalang ni Antipolo Bishop Ruperto Santos kinsang midasig sa mga matuuhon nga itugyan kining importante nga desisyon pinaagi sa pag-ampo kang San Pedro, ang unang Santo Papa, aron ang mopuli nga pangulong magbalantay kay magpabiling lig-on sa pagtuo ug pundasyon sa Simbahan.
Gidasig usab sa Obispo ang mga parokya nga sakop sa iyang hurisdiksyon nga kon mapili na ang bag-ong Santo Papa, kinahanglang patingogon ang mga kampana sa matag simbahan.
Matod niya nga timaan kini sa kalipay ug pasalamat sa kataposang pagpili sa sunod nga lider nga puli kang anhing Pope Francis.
Lakip sa mga cardinal-electors gikan sa Pilipinas mao ang Catholic Bishops’ Conference of the Philippines President, Kalookan Bishop Pablo Virgilio Cardinal David, Vatican Dicastery for Evangelization kanhi Pro-Prefect, Luis Antonio Cardinal Tagle, ug Manila Archbishop Jose Cardinal Advincula.
