Gilibkas na ang mga suspensyon sa mga klase nga face-to-face sa tanang levels sa publiko ug pribadong mga eskwelahan sa Cebu City karong adlawa, Oktubre 13, 2026, kini human mius-os ngadto sa 140 ang Air Quality Index (AQI).
Ingon man balik nasad sa klase ang dakbayan sa Lapu-Lapu ug lungsod sa Minglanilla, apan, giawhag ang mga tinun-an, ginikanan ug mga magtutudlo nga magsul-ob og face mask.
Gitambagan usab ang mga tunghaan nga magpabiling mabinantayon ug mohimo og mga lakang sa pag-amping aron mapanalipdan ang mga estudyante, magtutudlo, ug mga kawani sa eskwelahan, ilabi na ang sensitibo sa polusyon sa hangin.
Mipasalig usab ang buhatan sa Environmental Management Bureau Region VII (EMB-7) nga padayon sila sa pagbantay sa kalidad sa hangin ug mohatag dayon og mga advisory alang sa kalamboan ug kausaban sa sitwasyon sa hangin sa Metro Cebu.
