CEBU CITY- Nagtapok sa University of the Philippines Cebu ang mga kongresista nga sakop sa House Committee on Suffrage and Electoral Reform alang sa ikaduhang public consultation sa gisugyot nga Anti-Political Dynasty Bill karong Huwebes, Pebrero 19, 2026.
Sa pakighinabi sa mga tigbalita, si Cong. Edgar Erice, representante sa Ikaduhang Distrito sa Caloocan, mipasiugda nga dugay nang gitinguha ang pagpasa sa maong balaod subay sa mandato sa 1987 Constitution of the Philippines, apan hangtod karon wala pa kini mahatagi og implementing law.
Sumala ni Erice, dako nga bahin sa korapsyon sa nasud nag-gikan sa konsentrasyon sa gahum sa pipila ka pamilyang politikal, diin ang mga posisyon sa gobyerno gipanunod gikan sa lolo, amahan, anak, hangtod sa apo.
Matud pa niya, kung mapatuman ang tinuod nga pagdili sa political dynasty, dako ang posibilidad nga maayong kausaban sa sistema sa pamalaod, ilabi na sa pagwagtang sa gitawag niyang kahakog sa gahom, diin gihimo’g personal nga propiedad ang public office.
Iyang gisugyot nga hangtod sa ikaduhang degree sa pagkaparente ang sakup sa ipatuman nga pagdili aron malikayan ang kalisod sa enforcement ug posibleng legal nga mga hagit kon palapdan pa ang coverage.
Gipunting usab ni Erice nga ang kapaspason sa pagpasa sa balaod magdepende sa political will sa administrasyon ug sa suporta sa Kongreso, ilabi na kon adunay lig-on nga supermajority.
Gipasabot niya nga ang maong panukala dili personal nga atake batok sa mga pamilyang politikal, kundili usa ka lakang aron masiguro nga ang eleksyon mahimong patas, bukas, ug base sa kapasidad sa kandidato, dili sa apelyido.
Sa pagkakaron, nagpadayon ang panawagan sa nagkalain-laing sektor nga unahon sa gobyerno ang Anti-Political Dynasty Bill isip dakong lakang batok sa sistematikong korapsyon sa nasud.
Ang tumong sa konsultasyon, sumala ni Committee Chairman ug Lanao del Sur Rep. Zia Alonto Adiong, mao ang pagpamati sa opinyon sa katawhan bahin sa maong lakang.
Una kini nga gipahigayon sa Carsigma Gym, ikaduha sa Cebu ug ang ikatulo sa Cagayan de Oro sa musunod nga mga adlaw.
