Mga konsumidor sa Visayan Electric Company, makasinati og usbaw sa ilang bayronon sa kuryente ning buwan sa Mayo

CENTRAL VISAYAS-Makasinati ang mga konsumidor sa Visayan Electric Company og usbaw nga .86 centimos matag kilowatt-hour (kWh) sa ilang bayronon sa kuryente ning buwan sa Mayo hangtod sa Hunyo.

Diin ang pagsaka gumikan sa taas nga generation rates tungod sa pagsaka sa presyo sa Wholesale Electricity Spot Market (WESM) niadtong Abril dala sa kabalaka sa suplay sa kuryente sa Visayas Grid.

Tungod niini, ang kinatibuk-ang bayranan sa kuryente sa residential mosaka gikan sa P11.28 matag kilowatt-hour sa miaging buwan ngadto sa P12.14 matag kilowatt-hour karong buwana.

Samtang alang sa mga households nga adunay average nga binuwan nga konsumo nga 200 kWh, kini nagpasabot sa dugang gasto nga P172 sa ilang umaabot nga bayronon.