Himuon na nga mandatory o obligado ang mga lokal nga kagamhanan lakip na ang mga barangay nga mopasar og lokal nga ordinansa alang sa paghatag og proteksyon sa mga bata batok sa online sexual abuse.
Matud ni DILG Secretary Benhur Abalos nga ila usab nga mandoan ang DILG sa pagpahigayon og mga pagbansay-bansay alang sa mga personnel o kawani sa LGUs ug barangay kon unsaon pagtubag sa mga reklamo sa online sexual abuse nga gidala ngadto kanila o mahitabo sa ilang mga konstituwente.
Gitataw ni Abalos nga importante nga ma-capacitate o mahatagan og igong depensa ang mga lokal nga kagamhanan, ilabina ang mga barangay, aron ilang mahibaw-an kung kinsa ang kaestorya sa mga bata kalabot sa sitwasyon nga ilang giatubang ug dasigon sila sa pagtaho aron ang mga nagpaluyo kanila masikop.
Gipasabot ni Abalos nga ang tanang hingtungdan nga ahensya sa gobyerno, gikan sa brgy, police, social workers, ug prosecution, maghiusa aron matubag ang nagkadako nga problema sa online sexual abuse.
Matod ni Abalos, iya usab nga mandoan ang DILG ug ang nasudnong kapolisan sa paghimo og mga programa nga magpasiugda sa pagpanalipod sa mga bata batok sa mga online predator.
