Andam ang mga lider sa Quad Committee sa House of Representatives nga moabaga sa gasto sa plitehan ug akomodasyon ni kanhi Presidente Rodrigo Duterte aron lang makatambong sa hearing kalabot sa mga kaso sa extrajudicial killing sa iyang kampanya sa war on drugs.
Diin lakip sila si Quad Comm overall chair Robert Ace Barbers, ug co-chairmen Dan Fernandez, Bienvenido “Benny” Abante Jr., ug Joseph Stephen “Caraps” Paduano, vice chair Romeo Acop, Senior Deputy Speaker Aurelio “Dong” Gonzales Jr., ug Deputy Speaker David “Jay-jay” Suarez aron dili mahimong babag ang gasto ni Duterte sa pagtambong sa hearing.
Matud ni Rep. Barbers nga kung kwarta ang tinuod nga usa ka isyu, andam sila sa pag-abag sa iyang pagbiyahe ug akomodasyon. Kini mahitungod sa katungod sa katawhan nga masayod sa kamatuoran mahitungod sa giingong pagpangabuso sa mga anti-drug operations sa iyang administrasyon.
Ang wala pagtambong ni Duterte nakapasubo sa mga kongresista sama nila ni Majority Leader Manuel Jose “Mannix” M. Dalipe, House Assistant Majority Leaders Jay Khonghun sa Zambales ug Paolo Ortega sa La Union, kinsa miingon nga posibleng nahadlok si Duterte sa mga pangutana mao nga wala kini motambong.
Sa miaging hearing, si Paduano, chair sa Committee on Public Accounts, niingon nga posibleng gituyo ang wala pagtambong ni Duterte.
Apan sa sunodsunod nga suwat ni Delgra, niingon siya nga nakahukom ang kanhi Presidente nga di na lang motambong kay giingong dili na kini kinahanglan human siya motunga sa Senate hearing ug gamiton na lang kini sa Kamara sa pag-impeach kaniya.
Ang mga lider sa Quad Comm niingon nga seryuso sila sa pagpangutana kang Duterte nga mahibaw-an ang kamatuoran.
Hinungdan nga gihimug-atan ni Acop, ang kaandam sa mga lider sa komitiba nga mogasto maoy pagpakita nga gusto nilang mohimo og lawom nga imbestigasyon aron masayran ang kamatuoran.
