CEBU CITY-Human sa opisyal nga pagsugod sa usa ka buwan nga paghandum sa ika-454 nga anibersaryo sa pagkatukod sa lalawigan sa Sugbo, ang mga lider sa mga dakbayan sa Sugbo, Mandaue ug Lapu-lapu, ug lalawigan miawhag sa panaghiusa alang sa mas mauswagon nga Sugbo.
Nagtapok ang mga opisyal sa probinsiya ug tri-city sa Kapitolyo niadtong Martes, Agosto 1, aron mosalmot sa flag-raising ceremony nga nagtimaan sa pagsugod sa tibuok buwan nga mga kalihukan.
Atol sa maong panagtapok, ang wall of commitment gipirmahan ni Gobernador Gwendolyn Garcia, ingon man ang mga mayor sa tri-city ug province, board members, department heads, ug nagkalain-laing stakeholders aron ipakita ang ilang suporta sa Department of Tourism (DOT) “Love the Philippines” nga kampanya ug aron ipakita ang ilang panaghiusa.
Malaumon si Garcia nga maghiusa ang Sugbo bisan pa sa daghang mga hagit nga ilang nasugatan.
Gisaulog sa Probinsiya sa Sugbo ang anibersaryo sa pagkatukod niini sa Agosto 6 matag tuig nga gimando sa Republic Act 8952, nga nagdeklarar og special non-working holiday sa tibuok Sugbo, apil na ang highly-urbanized nga mga siyudad.
