CARCAR CITY, CEBU-Nagpasalamat ang pipila ka mga negosyante kang Cebu Provincial Governor Gwendolyn Garcia sa pagpahunong sa culling sa dakbayan sa Carcar.
Gibutyag ni Lorna Ricarte, ang presidente sa Calisujan United Farmers Association, nga grabi nga stress ang ilahang gibati gumikan kay mao kini ang ilahang panginabuhi-an.
Matud pa, mangayo gayud sila ug igo nga assistance sa Kapitolyo kung ugaling mahinayon ang pag-cull sa ilahang mga baboy sa umaabot nga mga adlaw.
Sigon ni Ricarte nga dako sila ug alkansi diin sa feeds pa lang mukabat na sa dul-an P2 million ang ilahang gasto sa asosasyon, ug wala pa kini labot sa mga magba-baboy nga naggasto lang ug ilahang kaugalingon nga feeds.
Gipahibalo usab niini nga mukabat sa P3,800 ngadto na sa P4,000 ang presyo sa baktin, samtang ang butakal ug anay kay mukabat sa P20,000 ngadto sa P40,000 ang presyo.
Hinuon, sa pagkakarun, gibalik naman ang ilahang mga baboy ug gikinahanglan na lang nila kini nga i-monitor diin kung adunay magluya kinahanglan nga ilaha kining ipahibalo.
Gihatagan usab sila ug disinfectant arun sa kanunay nga pagpahigayon ug pag-disinfect sa ilahang mga area.
