CEBU CITY — Walay puas nga mipadangat og pahasubo ang mga lider sa nasud nunot na sa pagtaliwan ni Cebu City North District Rep. Raul Del Mar.
Gisuspenso sa House of Representatives ang ilang naandang sesyon kagahapon nunot na sa ilang pagbangutan kamatayon ni Del Mar.
Subay na sa ilang pagpadangat og kinasingkasing nga pahasubo, daling mi-adopt ang Kongreso sa House Resolution 1355 isip pagpadangat sa ilang pahasubo ngadto sa pamilya ni Del Mar.
Unang gikumpirmar sa pamilya ang pagkamatay sa kongresista niadtong Lunes sa gabii sa edad nga 79.
Matud ni House Majority Leader Martin Romualdez nga mingawon sila sa maong magbabalaud kinsang nihimo og mga balaud aron molambo ang kinabuhi sa tawo.
Samtang gihulagway ni House Speaker Lord Allan Velasco si Del Mar nga wala kini puas sa pagpangalagad sulod na sa 27 ka tuig.
Misaludo usab ang Senado sa mga nahimo ni Del Mar isip usa ka kongresista.
Gihulagway ni Senador Richard Gordon si Del Mar isip maayong higala gumikan kay daan sila nga nagkauban sulod na sa taas-taas nga panahon.
Samtang mipadangat ang Malacañang og pag-ampo alang sa kapahulayang dayon sa maong kongresista.
Giila ni PCOO Secretary Martin Andanar ang dakong kontribusyon ni Del Mar isip “Kampeon sa Media” gumikan sa patas nga pagbalita.
