CEBU CITY – Dili makonsidera nga bakunado na ang mga sugboanun nga nisalmot ug naturukan sa COVID-19 vaccine nga gikan sa China ug gipa-ubos pa sa Clinical Trial dinhi sa dakbayan sa Sugbo.
Kini ang gihingusgan ni Cebu City Health officer in charge (OIC) nga si Dr. Jeffrey Ibones may kalabutan sa clinical trials sa bakuna nga gama sa WestVac BioPharma Co.
Tataw pa niini nga ang mga indibidwal nga naturukan niini kay dili usab maapil sa ihap sa syudad ug sa national government alang sa vaccination rollout.
Dili usab kini mahatagan og vaccination card ug dili usab kini makapahimulos sa pribelihiyo nga anaa sa vaccine card.
Nasayran usab nga adunay pagtugot sa Department of Health (DOH) ang maong clinical trial apan wala pahibaw-a ang City health ug ang mismong City Government.
Matag partisipante niini kay makadawat og P2,500 hangtud sa P5,000.
Tataw niini nga wala kini’y supak sa clinical trial apan naghinaut kini nga gipahibaw unta ang syudad arun ma-monitor usab ang mga partisipante ilabi na ang ilang kaluwasan mahitungod sa bakuna nga giturok sa ilang lawas.
Sa pakig-alayun niini sa tambalanan nga nalambigit niini kay target sa clinical trial nga 700 – 800 ang maturukan sa bakuna.
Una niini, gibulgar ni Councilor David Tumulak nga adunay usa ka tambalanan ang nagpahigayun og clinical trial sa bakuna nga wala pa nahatagan og rehistro o napaila-ila sa katawhan.
MGA NABAKUNAHAN
Nipaabot ang usa ka concern citizen sa iyahang mga nahibaw-an kabahin sa isyu sa pagpamakuna sa usa ka pribadong tambalan sa pipila ka indibidwal nga walay approval gikan sa ahensya sa panglawas.
Eksklusibong gikahinabi sa Bombo Radyo Cebu ang usa ka ginganlan nga Juan, diin miangkon kini nga usa siya sa pamatuod nga adunay nahitabong pagpamakuna sa usa ka pribadong tambalanan.
Sigon pa niini nga, mopahigayon una og screening ang mga personnel sa tambalanan una pa kini turokan sa maong bakuna.
Matod pa ni Juan, nga siya mismo nakaagi sa maong screening apan wala makapasar ang iyahang dugo sa maong bakuna maong wala mahinayon ang pagturok sa among bakuna kaniya.
Sa kinatibuk-an makadawat ang usa ka indibidwal ug P10,000.//
Asoy pa niini, nga adunay usa ka indibidwal nga si “Kulot” ang mibisita sa ilang lugar diin nangita kini og taw nga daghan og kaila aron maoy sugoonsa pagpanglista sa bakuna.
Mibutyag kini, nga nagpakitabang nalang kini sa maong sitwasyon tungod usab sa kabalaka niini sa iyahang mga silingan sa ilang kaluwasan. Kini human walay gipirmahan nga waiver ang ma nagpabakuna ug mipasalig lang ang tambalanan sa Perpetual Soccoro nga moadto sa ilahang ospital kung ugaling dunay mahitabo sa mga nagpabakuna.
Miawhag nalang kini sa katawhan nga dili magpadala sa maong salapi tungod mas importante ang kaluwasan nga dili gayud mabayloan sa bisan unsang butang./EKP
