CEBU CITY – Gi-ilisan na sa pamunu-an sa Mandaue Elementary School ang mga modules sa 32 ka mga magtutungha nga nabasa human gibaha ang Brgy. Paknaan, dakbayan sa Mandaue niadtong adlaw nga Domingo gumikan sa kusog nga uwan sa pipila ka bukiran barangay sa dakbayan sa Sugbo.
Sa kinatibuk-an, anaa sa kapin 300 ka mga printed modules ang nabasa. Sigon pang Paknaan Elementary School Principal Dr. Mary Jean Codiñera nga nikuha na ang mga ginikanan niining mga apektadong estudyante og bag-ong modules apan di pa tanan niini naka-kuha.
Subay niini gipaniguro ni Dr. Codiñera nga ila nalang i-apil sa pag-distribute ngadto sa mga ginikanan nga wa pa kakuha og hulip sa nabasa nga modules ang maong mga learning materials karong adlaw nga Biyernes, Oktubre 9, sanglit manghatag naman pud ug modules ang mga magtutudlo alang sa Week 2 sa blended learning.
Hatagan usab matod pa Dr. Codiñera og konsiderasyon ang mga batang apektado sa baha diin pwede nila ma-submit ang ilang mga answered modules sa adlaw nga Lunes, Oktubre 12, imbes nga sa adlaw nga Biyernes isip deadline sa Week 1 nga printed modules nga nabasa.
Nasayran nga adunay kamanduan alang sa mga magtutudlo nga kinahanglang aduna gayud back-up nga mga modules alang sa mga susamang panghitabo.
Hinoon una na usab nga gipasabot sa mga magtutudlo ngadto sa mga ginikanan atol sa orientation kung unsaon sa pag-amping sa mga modules aron malikayan ang mga susamang kakuli-an.
“Dapat unta every friday, so atu lang hatagan og extension kanang mga nabasa nga modules. Pwede rana nila i-submit on monday,” saysay pa ni Codinera
Samtang sa datos sa maong tunghaan, adunay 3,601 ka mga magtutungha ang naka-enroll karon nga school year, mas ubos kung itandi sa nakalabay’ng school year diin anaa sa 3,629 ang mga nagpa-enroll.// GBS & EKP
