Midilaob ang lihok-protesta sa mga nagkadaiyang grupo sa Sugbo atol sa reklamo niini sa pabiling init sa suliran sa katilingban nga mao ang anomaliya sa mga proyekto sa imprastruktura ilabi na sa mga flood control.
Nahitabo ang mga kalihokan kagahapong adlawa sa Dominggo, Septiyembre 14 sa Plaza Independencia ning dakbayan sa Sugbo.
Pipila sa mga misalmot sa maong lihok-protesta kay mga kabatan-onan, mga trabahante, ug mga civic oriented groups kansang mipadayag sa ilang kasagmuyo ug kalagot sa binilyon sa pundo sa kagamhanan ang nausiko tungod sa kurapsyon samtang ang publiko kay nag-antos sa minugna sa gma bulay-og nga mga proyekto.
Sa pakighinabi sa Bombo Radyo Cebu News Team kang Edgar Ligas, ang Convenor sa Panaghiusa sa Yanong Sugbuanon Batok sa Korapsyon nga walay tumong sa pamolitika ang ilang rally ug nagtumong kini sa pagpadangat sa nasudnong panggamhanan sa kasuko sa mga Sugbuanon sa kahiwian sa DPWH, mga pribadong kontraktor, ug mga nanganlan nga kongresista ug senador diin hinaot nilang adunay mapriso sa maong anomaliya.
Sugyot sa mga nag-organisar niini nga kabahin palang kini sa umaabot pang mga rally sa tibuok nasud karong semanahuna nga adunay kulminasyon sa umaabot Septiyembre 21 ang anibersaryo sa pagdeklarar og martial law sa diktadorang Ferdinand Edralin Marcos Sr. niadtong dekada 70s.
