Gi-endorso na sa City Legal Office sa kagamhanag dakbayan sa Sugbo ang mga nalambigit sa fake PWD Card scheme aron mahatagan sa angay nga silot matod pa ni Cebu City Councilor James Cuenco.
Kini human sa ilahang nahitabong executive session niadtong milabay nga semana og mipatin-aw si Cuenco nga ang Sangguniang Panlungsod walay gahum mu-silot sa mga nalambigit nga mga personalidad sa Opisina sa alkalde ni Suspended Cebu City Mayor Michael Rama.
Kini pud aron mahatagan sa katungod ang mga naasoy nga mga empleyado sa saktong representasyon sa pagpatin-aw pinaagi sa ilahang mga abogado.
Dugang pa ni Cuenco, padayon nga nakitimbayayong ang mga hingtungdan o mga testigo og pursigido kini mukiha og kaso.
Sa samang bahin, mipamahayag usab si PORTIA BASMAYOR, ang OIC sa Department of Social Welfare Services sa dakbayan sa Sugbo kun diin gi-awhag niya ang mga business establishments sa pagsusi sa mga mu-avail ug discounts pinaagi sa PWD IDs kay aduna man kiniy QR Code nga pwedeng ma-scan aron maklaro ang detalye kun tinuod ba ang maong indibidwal isip person-with-disability.
Ingon man nga pwedeng ma-scan kini pinaagi sa mga camera sa selpon ug mugawas kini ang mga detalye nga gihatag sa QR Code.
Pasalig pud ni Basmayor nga niadtong panahon human ang delubyo sa Bagyong Odette nga nag mano-mano ang sistema sa ahensya, pwedeng mubisita sa opisina sa DSWS ang mga rehistradong holder sa PWD IDs aron mabutangan kini o mailisan sa ID nga aduna nay security feature.
