CEBU CITY-Itugyan na sa City Legal Office ang mga nalambigit sa pagpamaligya sa persons with disabilities ID sa kantidad nga P4,000 ngadto sa mga himsog ug walay deperensya.
Human kini gilimod ang maong pasangil sa dihang tagsa-tagsa kanila ang gipatawag arun mo-eksplekar sa ilang habig gahapong adlawa.
Apan, bisan paman sa ilang kusganon sa pagdili sa maong anomalya kay miinsistir usab ang lima ka testigo ni Cebu City Councilor James Cuenco nga maoy nitudlo sa mga indibidwal nga nipasiugda sa pagpamaligya og mga fake PWD IDs.
Hinungdan nga sunod nga lakang nga buhaton sa konsehal nga ipasaka kini ngadto sa City Attorney’s Office ug ipaatubang ang mga giingong responsable ug ang mga saksi arun nga mahusay ug mahan-ay na kini ang maong isyu sunod semana.
Sa pikas bahin, uyon usab ug gidayeg sa Konsehal ang plano kabahin sa pagbutang og mga scanner sa mga tindahan arun mahibaw-an ug mapanalipdan sila sa mga matang sa peke nga mga ID.
Ingon man nga gipaambit ni Cuenco nga sugdan na ang pagdisenyo og bag-ong ID diin dili lang alang sa mga PWD tungod kay lakip na usab sa mga Senior Citizens nga adunay security measures ug timailhan kon peke ba kini.
